ବୋଉ ଲିକୁକୁ ଦୋକାନ ପଠେଇଲା। ଜିରା ଆଣିବା ପାଇଁ। ମସଲା ବାଟିବା ପାଇଁ ଜିରା ସରି ଯାଇଥିଲା। ମଟନ ତରକାରୀ ହେବ। ମାନି ଅପା ପାଇଁ ବର ଘର ଦେଖି ଆସୁଛନ୍ତି, ପୁଅର ବାପା ମାଆ ଆଉ ମାମୁଁ ମାଇଁ।
ଲିକୁ ଦୋକାନକୁ ଗଲା।
“Uncle, ଜିରା ଶହେ ଗ୍ରାମ ପ୍ୟାକେଟ ଗୋଟେ ଦିଅ।”
ଏତିକି ବେଳେ ଦୋକାନ ସାମ୍ନା ରେ ଗୋଟେ କଳା କାର୍ ଅଟକିଲା। ଜଣେ ମହିଳା ଓହ୍ଲେଇ ଦୋକାନକୁ ଆସି ଠିଆ ହେଲେ।
ଦୋକାନୀ ପଚାରିଲେ ” ମ୍ୟାଡାମ.. କଣ ନେବେ..?”
“ମଟର …ଅଢେ଼ଇ ଶ’ …”
“ବାବୁରେ କାବୁଲା.. ମ୍ୟାଡାମ ଙ୍କୁ ମଟର ଦେଲୁ ଅଢେ଼ଇ ଶ’।”
ଆଜ୍ଞା…
କାବୁଲା ଲିକୁକୁ ଟିକେ ଠିଆ କରେଇ ଦେଇ ଏପଟେ ମଟର ପାଏ ଓଜନ କଲା।
ଲିକୁ ମହିଳାଙ୍କ ଆଡ଼େ ଦେଖି ପଚାରିଲା ” ଆଣ୍ଟି,ଆପଣଙ୍କର ଆଜି ମଟର ତରକାରୀ ହେବ?”
“ହଁ ବେଟା.…”
“ଆଜି ଆମର ମଟନ ତରକାରୀ ହେବ। ମାନି ଅପାକୁ ବାହାଘର ପାଇଁ ଦେଖିବାକୁ ଆସୁଛନ୍ତି ତ, ସେଥିପାଇଁ।”
“ଆଚ୍ଛା ଆଚ୍ଛା, so sweet..
God bless you , God bless your ମାନି ଅପା ..”
ଟିକେ ହସି ମହିଳା ଜଣକ ଚାଲିଗଲେ।
ବୋଉ କେତେ ପ୍ରକାର ରାନ୍ଧୁଥାଏ।ମାନି ଅପାକୁ ବିଥି ମାଉସୀ ସଜେଇ ଦଉଥିଲା।ମାନି ଅପାର ମୁହଁ କାନ୍ଦ କାନ୍ଦ ଦିଶୁଥିଲା।
ଚାରି ଜଣ ଅତିଥି ଘରକୁ ଆସିଲେ।
ବିଥି ମାଉସୀ ତାଙ୍କୁ ଗୋଡ଼ ଧୋଇବା ପାଇଁ କଂସା ଢ଼ାଳରେ ପାଣି ଦେଲା।
ସେମାନେ ଗୋଡ଼ ଧୋଇ ଆସି ସୋଫାରେ ବସିଲେ।
ବାପା ବୋଉ ଆସି ତାଙ୍କୁ ଜୁହାର ହେଲେ , ସାମ୍ନା ଚଉକିରେ ବସିଲେ।ବୋଉ ଟିକେ କଥା ହେଇକି ରୋଷେଇ ଘରକୁ ପୁଣି ଚାଲିଗଲା।
ଦୁଇ uncle ଙ୍କ ସାଙ୍ଗେ ବାପା ବହୁତ୍ କଥା ହେଉଥାନ୍ତି, ଅଫିସ୍, transfer ଆଉ କଣ କଣ .. ଏମାନେ ସମସ୍ତେ କଣ ଆଗରୁ ଚିହ୍ନା ଜଣା ନା ଏଇ ପନ୍ଦର ମିନିଟ୍ ରେ ସାଙ୍ଗ ହେଇଗଲେ।
ବିଥି ମାଉସୀ ପିଇବା ପାଣି ଆଣି ଥୋଇଲା।ଆଉ ଜଳଖିଆ ଆଣିବା ପାଇଁ ରୋଷେଇ ଘରକୁ ଗଲା।
ଆଣ୍ଟି ଦୁଇ ଜଣ ଧୀରେ ଧୀରେ କଣ କଣ କଥା ହଉଥାନ୍ତି ତାଙ୍କର ତାଙ୍କର ଫୁସୁର ଫାସୁର୍ ହେଇକି।
ସେମାନେ ବୋଧେ ମାନି ଅପାକୁ କଣ କଣ ପ୍ରଶ୍ନ ପଚାରିବେ,ଏକ ଦୁଇ ତିନି କରିକି ନମ୍ବର କରୁଥିଲେ।
ହଁ ତ ସତ କଥା।
ସେମାନେ ବିଥି ମାଉସୀ କୁ କହିଲେ” ଝିଅକୁ ଡାକ”
ବୋଉ ରୋଷେଇ ଘରୁ ଝାଳ ପୋଛି ପୋଛି ତରବର ହେଇ ମାନି ଅପା ଆଉ ବିଥି ମାଉସୀ ସାଙ୍ଗରେ ଜଏନ ହେଲା।
ମାନି ଅପା ତଳକୁ ମୁହଁ ପୋତି ତା ଡ୍ରେସର ଓଢ଼ଣି ଖସୁ ନ ଥିବା ସତ୍ତ୍ବେ ଖାଲି ଖାଲିରେ ବିଚରା ଓଢ଼ଣିକୁ କାନ୍ଧ ଉପରକୁ ଟେକି ଟେକି ଆସି ଆଣ୍ଟି ମାନଙ୍କର ଠିକ୍ ସାମ୍ନାରେ ବସିଲା।
ତାପରେ ତ ଖାଲି ତାକୁ କଣ କଣ ପଚାରି ଆଣିଲେ।
ବିଥି ମାଉସୀ ପୂରା ସାଙ୍ଗରେ ସାଙ୍ଗରେ ଥାଏ, ମାନି ଅପା ନର୍ଭସ ହେଲେ ତାକୁ ସମ୍ଭାଳିବା ପାଇଁ।
“ଝିଅ, ତୁମ ନାଁ କଣ ?”
“ମନୋରମା..”
“କଣ ପଢ଼ା ପଢ଼ି କରିଛ?”
“ପି. ଜି. , ଲାଇଫ ସାଇନ୍ସ ରେ।”
ଆଚ୍ଛା.……ଆଉ କଣ କଣ ..ଆଉ କେତେ କଣ.…
ବୋଉକୁ ମାନି ଅପାର ଜାତକ ବିଷୟରେ ପଚାରିଲେ।
ବୋଉ କହିଲା ” ଯଦି ପୁଅ ଆସିଥାନ୍ତେ, ତାହେଲେ ପୁଅ ଝିଅ ଦେଖା ଦେଖି ହେଇ ଯାଇଥାନ୍ତେ , ଭଲ ହେଇଥାନ୍ତା।”
“ହଁ ପରା,ଆମେ ବି ସେଇଆ ଭାବୁଥିଲୁ।ହେଲେ ତନ୍ମୟର ଆଜି ରବିବାର ହେଲେ ବି କାମ ଅଛି ଦିନ ବେଳା ,ଉପର ବେଳା ଫ୍ରି ଥିଲେ ବି ଦିନ ବେଳର କାମ ପାଇଁ ସେ ଆସି ପାରିଲାନି।ଏଇ ପ୍ରୋଗ୍ରାମ ପାଇଁ କଲିକତା ରୁ ଆସିବା ପାଇଁ ନିହାତି ଦୁଇ ଦିନ ଦରକାର। ଛୁଟି ମିଳିଲାନି ତାକୁ।”
ଗଲା ମାସ ବୋଉ ଯୋଉ ଯାଇଥିଲା ମାନି ଅପାର ଜାତକ ନେଇକି ଦେଖେଇଥିଲା ସୁନ୍ଦରମଣି ବାବାଙ୍କ କତିରେ, ସେ କହିଥିଲେ ଏଇ ମାସ ଶୁକ୍ଳ ପକ୍ଷରେ ଯୋଉ ପ୍ରସ୍ତାବ ଆସିବ, ମାନି ଅପାର ବାହାଘର ସେଇଠି ଠିକ୍ ହେଇଯିବ।
ବାପା ବୋଉ ବିଥି ମାଉସୀ ଆଉ ଲିକୁ ସବୁ ନିଶ୍ଚିତ କି ଏଇଠି ଠିକ୍ ହେଇଯିବ।
ଆଣ୍ଟି ଦି’ ଜଣ ଘର ଭିତର, ଛାତ ଉପର,ବାରି ଆଡ଼ ସବୁ ଆଡୁ ଘେରାଏ ବୁଲି ଆସିଲେ।
ଲିକୁ କୁ କାହିଁକି ସେଇ ଅଢେ଼ଇ ଶ’ ମଟର ଆଣ୍ଟି ମନେ ପଡ଼ିଗଲେ।
God bless your ମାନି ଅପା .. କାହିଁକି କହିଲେ,ସେ କଣ ଚିହ୍ନିଛନ୍ତି ଅପାକୁ?
ଆରେ… ହଁ.. ଲିକୁ ତ ନିଜେ କହିଲା ପୁଅ ଘର ଦେଖି ଆସୁଛନ୍ତି ସେଥିପାଇଁ ଘରେ ମଟନ ହଉଛି ବୋଲି।ସେଥି ପାଇଁ ସେ ଆଣ୍ଟି ସେମିତି କହିଥିବେ।
ବୋଉ ସିଆଡେ ବଢ଼ା ବଢ଼ି କରୁଛି।
ସମସ୍ତେ ଖାଇ ସାରିଲେ, ମାନି ଅପା ଆଉ ବିଥି ମାଉସୀ ପାଇଁ ବାଢ଼ି ସରିଲା ପରେ ଲାଷ୍ଟ୍ ରେ ବୋଉ ଖାଇବ।
ଲିକୁ ବୋଉ ପାଖକୁ ଯାଇ ଅଳି କଲା କି ମାନି ଅପାର ତ ବାହାଘର ଏଇଠି ଠିକ୍ ହେବ।
ତନ୍ମୟ ଜିଜୁଙ୍କ ସାଙ୍ଗରେ video calling କରି ତାଙ୍କୁ ଦେଖିବା ଆଉ କଥା ହେବ । ବୋଉ କହିଲା ହଉ ଯା, uncle ଙ୍କୁ କହ ।
ଲିକୁ uncle ଙ୍କୁ କହିଲା ତନ୍ମୟଙ୍କ ସାଙ୍ଗେ ଭିଡିଓ calling ପାଇଁ।
Connection ହେଇ ପାରିଲାନି।ଫୋନ ମଧ୍ୟ ସ୍ଵିଚ ଅଫ୍ ଆସିଲା। ତାଙ୍କ ଘରର ଚାରିଟା ଫୋନ ରେ call କରାଗଲା। କୋଉ ଥିରେ ଲାଗିଲାନି।
ତାପରେ ବାପାଙ୍କ ଫୋନ୍ ରେ କରାଗଲା,ସେ ଉଠେଇଲେ।
ଓଃ .. ତାଙ୍କ ଘରର ଫୋନ ଉଠେଇଲେନି, କିନ୍ତୁ ଅଜଣା ନମ୍ବର ଉଠେଇଲେ।
ହଉ.… ବେଦୀ ରେ ଏମିତି ଜୋର ରେ ଶଳାବିଧା ପଡ଼ିବ ଯେ, ଉଠିବା ମୁସ୍କିଲ ହେଇଯିବ।
ହଉ, ଭିଡିଓ calling connect ହେଲା।ତନ୍ମୟ ସାଙ୍ଗରେ କାହାର କିଛି କଥା ହେବାର ନ ଥିଲା। ସୁନ୍ଦରମଣି ବାବା ତ ଭବିଷ୍ୟ ବାଣୀ ରେ ଶାଗୁଆ ପତାକା ଦେଖେଇ ଦେଇଥିଲେ।
ଖାଲି ଲିକୁ ଟା ଶଳାବିଧା ପକେଇବା ଆଗରୁ ଜିଜୁର କେତେ ଶକ୍ତି ଅଛି ଜାଣିବା ପାଇଁ ଇଚ୍ଛା କଲା, ଭିଡିଓ calling ରୁ ଫିଜିକ୍ ଫିଗର୍ ଦେଖି ସତେ ଯେମତି ସେ ବିଧା ମାରିଲା ବେଳକୁ consider କରିବ।
ହଠାତ୍…
“ଜିଜ୍ଜୁ, ତୁମ ପଛପଟେ କିଏ ଠିଆ ହୋଇଛନ୍ତି,ତାଙ୍କ ଗୋରା ଗୋରା ଦୁଇ ହାତ ତୁମ କାନ୍ଧ ଉପରେ ରଖିଛନ୍ତି, ବ୍ଲୁ ରଙ୍ଗର ବଳା ପିନ୍ଧିଛନ୍ତି, ଦୁଇଟା ଆଙ୍ଗୁଠିରେ ଦୁଇଟା ମୁଦି ପିନ୍ଧିଛନ୍ତି।ଲମ୍ବା ଲମ୍ବା ନଖରେ ବ୍ଲୁ ନେଲ୍ ପଲିଶ ଲଗେଇଛନ୍ତି। କିଏ ଯେ।
ବୋଉ,ବାପା, ମାନି ଅପା, ବିଥି ମାଉସୀ…..ଲିକୁ ସମସ୍ତଙ୍କୁ ଦି’ ଦି’ ଥର ଡାକି ପକେଇଲା।
ଭିଡିଓ disconnected ହେଇଗଲା।
Uncle ଆଉ ଥରେ ଫୋନ ଲଗେଇଲେ।
“ଆରେ ବାପା ତନ୍ମୟ … କଣ ହେଇଛି, ଲିକୁ କଣ କହୁଛି, କଣ ଦେଖିଲା ସିଏ…”
କିଛି ସମୟ ନିରବ…
“ବାପା ,ମୁଁ ତୁମକୁ ଏଇଠି କିଛି କହି ପାରୁନି”
Uncle ଫୋନ୍ କାଟି ଦେଲେ ଆଉ ବାପାଙ୍କ ଆଡ଼କୁ ଅସହାୟ ହେଇକି ଅନେଇଲେ।
ଆଣ୍ଟି ଦୁଇ ଜଣ ଦୁହିଁଙ୍କ ମୁହଁ ଚାହାଁ ଚାହିଁ ହେଉଥିଲେ, ଫୁସୁରୁ ଫାସୁର୍ ହେବାକୁ ଚାହୁଁ ଥିଲେ କି ଚାହୁଁ ନ ଥିଲେ କିଛି ଜଣା ପଡୁ ନ ଥିଲା।
ବିଥି ମାଉସୀ ଜୋର୍ ଜୋର୍ ରେ ନଖରେ ତା ମୁଣ୍ଡକୁ ରାମ୍ପୁ ଥିଲା।
ବୋଉର ଆଖିରୁ ମୋଟା ଲୁହର ଧାର ଗଡୁ ଥିଲା।
ଲିକୁ କୁ ବିନା ଶଳା ହେଇକି ତନ୍ମୟ ପିଠିରେ ଦୁମ୍ ଦାମ୍ ଧୁସ୍ ଧାସ୍ ବିଧା ପକେଇବାକୁ ଇଚ୍ଛା ହଉଥିଲା।
ମାନି ଅପା ତଥାପି ଡ୍ରେସିଂ ଟେବୁଲ ସାମ୍ନା ରେ ବସି ଥାଏ।
କେହି ସାହସ କରୁ ନ ଥାଆନ୍ତି ତାକୁ ସାମ୍ନା କରିବାକୁ।
ଲିକୁ ମାନି ଅପା ପାଖକୁ ଗଲା।ଯେମିତି ତା ମୁହଁକୁ ଚାହିଁଲା, ମାନି ଅପା ଫିକ୍ କିନା ହସି ଦେଲା।
ଲିକୁ କହିଲା ” ମାନି ଅପା, ଆଜି ଅଢ଼େଇ ଶ’ ମଟର ଆଣ୍ଟି ମତେ ତୋ ପାଇଁ କହିଥିଲେ ….. God bless your ମାନି ଅପା….”
🙏
ସଚଳା